Հայաստանի Հանրապետության քննչական կոմիտեն հրապարակել է 2025 թվականի գործունեության տարեկան հաշվետվությունը, որի համաձայն՝ զինված ուժերում և դրանց հետ առնչվող միջավայրում գրանցված մահվան դեպքերի ընդհանուր թիվը նվազել է՝ հատկապես զինվորական ծառայության հետ անմիջականորեն կապված դեպքերի կտրուկ նվազման շնորհիվ։
Ըստ զեկույցի՝ 2025 թվականին նախաձեռնվել է 26 քրեական վարույթ՝ 26 մահվան դեպքով, որոնք կապված են եղել 27 անձի հետ։ Նրանցից 16-ը զինծառայողներ են, 2-ը՝ աշխարհազորայիններ, 8-ը՝ քաղաքացիական անձանց, իսկ մեկ անձի ինքնությունը պարզված չէ։
Համեմատական վիճակագրություն
2024 թվականին արձանագրվել էր 35 դեպք՝ 40 մահացած անձով։ Այսպիսով, 2025 թվականին մահվան դեպքերի թիվը նվազել է 9-ով կամ 25,7%-ով, իսկ զոհերի թիվը՝ 13-ով կամ 32,5%-ով։
Զինվորական ծառայության հետ կապված դեպքերի նվազում
Այսպիսով, զինվորական ծառայության հետ անմիջականորեն կապված մահվան դեպքերը, որոնք կազմել են 9 դեպք (բոլորը՝ զինծառայողներ), նվազել են 10-ով կամ 52,6%-ով, իսկ զոհերի թիվը՝ 15-ով կամ 62,5%-ով։
Այս 9 դեպքերից 4-ը եղել են ինքնասպանության հասցնելու կամ հակելու դեպքեր (որից 2-ը՝ ՀՀ ԱԱԾ սահմանապահ զորքերի զինծառայողներ), 2-ը՝ դժբախտ պատահար (մեկը՝ հոսանքահարում, մյուսը՝ կայծակահարում), 2-ը՝ հիվանդության հետևանքով (մեկը՝ ԱԱԾ սահմանապահ զորքերի զինծառայող), իսկ 1-ը՝ հանկարծամահություն։
Առանց զինվորական ծառայության հետ կապի դեպքեր
Հաշվետու տարում քննված մահվան մյուս 17 դեպքերը (ընդհանուր 18 անձ) չեն առնչվել զինվորական ծառայությանը։ Դրանցից 7-ը եղել են զինծառայողների մահվան դեպքեր, 8-ը՝ քաղաքացիական անձանց, 2-ը՝ աշխարհազորայինների, իսկ մեկ դեպքով անձի ինքնությունը պարզված չէ։
Այս դեպքերից 2-ը նախաձեռնվել են սպանության հատկանիշներով (մեկը՝ անհայտ մարդու ձեռքի թաթի հայտնաբերման, մյուսը՝ պայմանագրային զինծառայողի՝ նախնական տվյալներով թմրամիջոց օգտագործելու հետևանքով մահվան դեպքով), 1-ը՝ ինքնասպանության հասցնելու կամ հակելու, 8-ը՝ ճանապարհատրանսպորտային կանոնների խախտման, 2-ը՝ հիվանդության, 2-ը՝ հանկարծամահության, իսկ 2-ը՝ առողջությանը ծանր վնաս պատճառելու և անզգուշությամբ մահ առաջացնելու դեպքեր։
Հատկանշական է, որ 2025 թվականին չեն արձանագրվել ծառայության հետ կապված սպանության դեպքեր (2024-ին՝ 5 դեպք), ինչպես նաև հակառակորդի կողմից սպանություններ (2024-ին՝ 3 դեպք, 4 զոհ)։ Նույնպես չեն գրանցվել ծառայության հետ կապված տրանսպորտային կամ մարտական միջոցների շահագործման կանոնների խախտմամբ մահվան դեպքեր (2024-ին՝ 2 դեպք, 5 զոհ), ինչպես նաև ռազմական ավիացիայի հետ կապված խախտումներ (2024-ին՝ 1 դեպք, 2 զոհ)։
