Այսօր Շենգավիթ վարչական շրջանում տեղի ունեցավ աշխարհահռչակ բռնցքամարտիկ Արթուր Աբրահամի անվան նոր մանկապատանեկան մարզահամալիրի հիմնարկեքի արարողությունը։ Միջոցառմանը ներկա էին Հայաստանի վարչապետ Նիկոլ Փաշինյանը, փոխվարչապետ Տիգրան Խաչատրյանը, ԿԳՄՍ նախարար Ժաննա Անդրեասյանը, ՏԿԵ նախարար Դավիթ Խուդաթյանը, Քաղաքաշինության կոմիտեի նախագահ Եղիազար Վարդանյանը և, իհարկե, մարզահամալիրի հիմնադրի՝ Արթուր Աբրահամը։
Նախագծի ներկայացումից հետո վարչապետ Նիկոլ Փաշինյանը և Արթուր Աբրահամը միասին ստորագրեցին սերունդներին ուղղված ուղերձը, որը հետագայում մարզիկների հետ տեղադրվեց մարզահամալիրի հիմքերում։
Այս հզոր կառույցը կառուցվում է Կառավարության կողմից հատկացված 2.3 մլրդ դրամանոց ֆինանսավորմամբ։ Մարզահամալիրը կունենա երկու մասնաշենք՝ մեկը ստորգետնյա, մյուսը՝ 3 վերգետնյա հարկերով։ Առաջին մասնաշենքում կտեղակայվեն ընդհանուր մարզման մարզասրահները, բռնցքամարտի և ըմբշամարտի մարզասրահները, որոնք կօժտվեն հանդերձարաններով, շոգեբաղնիքներով, բժշկի և մերսման սենյակներով, ինչպես նաև վարչական տարածքներով։ Երկրորդ մասնաշենքում կգտնվի բասկետբոլի ժամանակակից դահլիճ։
Արարողության ընթացքում վարչապետը շնորհավորեց ներկաներին և վստահություն հայտնել, որ մարզահամալիրը կհանձնվի շահագործման սահմանված ժամկետներում՝ բարձր որակով։ Նա նաև նշեց, որ Սիմոն Մարտիրոսյանի անվան մարզադպրոցն արդեն իսկ գործում է, իսկ մայիսին կկայանա Ալագյազ գյուղում Ռոման և Մալխաս Ամոյանների անվան դպրոցի հիմնարկեքը, որից հետո կսկսվի նրա շինարարությունը։
Վարչապետի խոսքով՝ այս նախագծերը համապատասխանում են Կառավարության քաղաքականությանը՝ միջազգային ասպարեզում հաջողություններ արձանագրած մարզիկներին արժևորելու, երկրում սպորտի զարգացմանը և առողջ ապրելակերպի խթանմանը նպաստելու համար։
