Հայաստանի Հանրապետության Ազգային Ժողովը երկրորդ ընթերցմամբ ընդունել է «Հայաստանի Հանրապետության տոների և հիշատակի օրերի մասին օրենքում լրացում կատարելու մասին» օրենքի նախագիծը։ Այս փոփոխության արդյունքում հունվարի 27-ը կդառնա հայրենիքի պաշտպանության համար զոհվածների հիշատակի օր, որը նաև կհամարվի ոչ աշխատանքային օր։
Այս մասին հայտնում է ԱԺ փոխնախագահ Ռուբեն Ռուբինյանը՝ նախագծի ներկայացնելիս։ Նրա խոսքով՝ օրենքի նախագիծը հիմնված է 2000 թվականի «Հայրենիքի պաշտպանության համար զոհվածների հիշատակը հավերժացնելու մասին» օրենքի վրա, որը սահմանում է, որ հիշարժան օրերի ընդունումը զոհերի հիշատակը հավերժացնելու հիմնական ձևերից է։
«Մենք չենք ցանկացել ընտրել մի օր, որը կապված է որևէ մեկ ռազմական իրադարձության հետ, քանի որ դա անխուսափելիորեն հարց կառաջացներ, թե ինչու այս օրը և ոչ մյուսը»,- բացատրել է Ռուբինյանը՝ ընդգծելով, որ հունվարի 27-ի ընտրությունը պայմանավորված է նրանով, որ հունվարի 28-ին նշվում է Բանակի օրը։ Ըստ նրա՝ այս կերպ հունվարի 27-ին կհիշատակվեն հայրենիքի պաշտպանության համար զոհվածները, իսկ հունվարի 28-ին կնշվի Բանակի օրը՝ որպես շարունակվող կյանքի խորհրդանիշ։
Օրենքի նախագծի հեղինակներն են ԱԺ փոխնախագահ Ռուբեն Ռուբինյանը և անկախ պատգամավոր Գեղամ Նազարյանը։ Նախագիծը նախատեսում է, որ այն կմտնի ուժի ոչ թե պաշտոնական հրապարակման օրվան հաջորդող 10-րդ օրը, այլ անմիջապես։
