Այսօր «Ուժեղ Հայաստան» դաշինքի անդամ կուսակցությունների հանդիպման ընթացքում ստորագրվեց «Ապրելու երկիր» կուսակցության և դաշինքի անդամ կուսակցությունների միջև համագործակցության հուշագիր։
«Ապրելու երկիր» կուսակցության նախագահ Մեսրոպ Առաքելյանը հանդես եկավ ելույթով, որտեղ նշեց, որ առաջիկա խորհրդարանական ընտրությունները հանձնվելու և պայքարելու միջև ընտրություն են։ Նրա խոսքով՝ հունիսի 7-ին հայ ժողովուրդը կունենա հնարավորություն՝ ընտրելու, թե արդյոք պետք է շարունակել հանձնվել առջևում ծառացած մարտահրավերներին, թե՞ պայքարել՝ քայլ առ քայլ լուծելով դրանք, պայքարել՝ ունենալով արժանապատիվ պետություն և ուժեղ ղեկավարություն։
Մեսրոպ Առաքելյանը նաև ընդգծեց, որ այս ընտրությունը նաև 19 հայ գերիների մասին է, ովքեր գտնվում են Բաքվում բացառապես իրենց ազգային ծագման պատճառով։ Նա հավաստիացրեց, որ «Ուժեղ Հայաստան» դաշինքի առաջնորդ Սամվել Կարապետյանը չի խնայելու ոչինչ՝ ապահովելու համար հայրենակիցների վերադարձը, ինչը նա համարում է ազգային արժանապատվության վերականգնման և կայուն խաղաղության հաստատման անհրաժեշտ պայման։
«Ուժեղ Հայաստան» դաշինքի անդամ մյուս կուսակցությունների ղեկավարները նույնպես հայտարարեցին, որ միասնական ջանքերով իրենց նպատակն է ստեղծել անվտանգ և կայուն Հայաստան։ Այս համագործակցության արդյունքում «Ապրելու երկիր» կուսակցության մարզային կառույցները ակտիվ կներգրավվեն «Ուժեղ Հայաստան» դաշինքի ընտրական ցուցակներում։
