Ադրբեջանը կանչել է իր դեսպանին Բաքվից և հանձնել բողոքի նոտա Եվրամիության դեսպան Մարիանա Կույունջիչին՝ խստորեն դատապարտելով Եվրոպական խորհրդարանի երեկ ընդունած բանաձևի «անհիմն և կողմնակալ դրույթները»։ Այս մասին հայտնում է Ադրբեջանի արտգործնախարարությունը։
Ադրբեջանի խորհրդարանը՝ Միլի մեջլիսը, իր հերթին որոշել է դադարեցնել հարաբերությունները Եվրոպական խորհրդարանի հետ։ Բացի այդ, Միլի մեջլիսը հատուկ հանձնաժողով է ստեղծել՝ «Եվրախորհրդարանի հակաադրբեջանական գործունեության վերաբերյալ որոշումներ կայացնելու» նպատակով։
Եվրոպական խորհրդարանը վերահաստատել է իր աջակցությունը Լեռնային Ղարաբաղի հայերի իրավունքներին՝ ներառյալ նրանց ինքնության, սեփականության և մշակութային ժառանգության պաշտպանությունը, ինչպես նաև նրանց անվտանգ, անխոչընդոտ և արժանապատիվ վերադարձի իրավունքը՝ միջազգային երաշխիքների ներքո։ Բանաձևը միաժամանակ դատապարտում է «Ադրբեջանի կողմից հայ ռազմագերիների, կալանավորվածների և պատանդների անարդարացի կալանավորումը» և պահանջում նրանց անհապաղ ազատ արձակում։
Ադրբեջանի ԱԳՆ-ն նախորդ օրը որակել էր Եվրախորհրդարանի բանաձևը որպես «անհիմն և կողմնակալ»՝ պնդելով, որ «ղարաբաղի հայերը կամավոր են լքել տարածաշրջանը»։ Բաքուն նաև կրկնել էր, որ Եվրախորհրդարանի կողմից որպես ռազմագերի բնորոշված անձինք «կատարել են լուրջ հանցանքներ, այդ թվում՝ ռազմական հանցագործություններ»։
Խորհրդարանի խոսնակ Սաբինա Գաֆարովան հայտնել է, որ սա առաջին անգամն է, երբ Միլի մեջլիսը ստիպված է դադարեցնել հարաբերությունները Եվրոպական խորհրդարանի հետ «հայամետ փաստաթղթերի ընդունման պատճառով»։ Նրա խոսքով՝ «անցած 10 տարիները ցույց տվեցին, որ Եվրախորհրդարանը մտադիր չէ հրաժարվել Ադրբեջանի դեմ իր կողմնակալ գործողություններից»։
Միլի Մեջլիսի հայտարարության մեջ նշվում է, որ «խրախուսելով ռևանշիստական ուժերին՝ Եվրախորհրդարանը փորձում է մեր տարածաշրջանը կրկին վերածել հակամարտության օջախի»։
