Եվրոպական խորհրդարանը ձայների ճնշող մեծամասնությամբ ընդունեց «Աջակցություն Հայաստանում ժողովրդավարական դիմակայունությանը» բանաձևի նախագիծը։ Այս որոշումը հստակ և վստահելի հայտարարություն է ԵՄ-ի կողմից Հայաստանի հանդեպ իր աջակցության մասին։
Բանաձևում ամրագրված է Եվրոպական խորհրդարանի վստահությունը Հայաստանի իշխանությունների հանձնառության նկատմամբ՝ ապահովելու ազատ, արդար և թափանցիկ ընտրություններ։ Խորհրդարանը լիակատար աջակցություն է արտահայտում Հայաստանի ջանքերին՝ պաշտպանելու ժողովրդավարական ինստիտուտները արտաքին միջամտություններից, և հատկապես ողջունում է 2026 թվականի հունիսին նախատեսվող խորհրդարանական ընտրությունները, որոնց արդյունքը պետք է որոշի բացառապես հայ ժողովուրդը։
Եվրոպական խորհրդարանը կոչ է անում ապահովել արդյունավետ երաշխիքներ ապատեղեկատվության, ապօրինի ֆինանսավորման, ձայների գնման և ճնշումների դեմ, ինչպես նաև ուժեղացնել ընտրական ենթակառուցվածքների պաշտպանությունը։ Խորհրդարանը խստորեն դատապարտում է Ռուսաստանից և նրա պրոքսիներից բխող հիբրիդային սպառնալիքները, այդ թվում՝ ապատեղեկատվական արշավները, կիբերհարձակումները և օլիգարխիկ ցանցերի օգտագործումը։ Ըստ բանաձևի՝ այս սպառնալիքները ունեն կառուցվածքային բնույթ, և անհրաժեշտ են շարունակական ջանքեր՝ ընտրական շրջափակումից դուրս ևս ժողովրդավարական դիմակայունությունը ամրապնդելու համար։ Այս համատեքստում Եվրոպական խորհրդարանն ողջունում է Հայաստանում ԵՄ դիտորդական առաքելության ստեղծումը և կոչ է անում ուժեղացնել ԵՄ աջակցությունը՝ ռազմավարական հաղորդակցության, մեդիագրագիտության, կիբերանվտանգության ոլորտում կարողությունների զարգացման միջոցով։
Բանաձևում նաև նշվում է ՀՀ-ԵՄ հարաբերություններում «ուժեղ առաջընթացը» և ընդգծվում են հատուկ մարտահրավերները, որոնք կապված են Հայաստանում մեծաթիվ ռուսական համայնքի, այդ թվում՝ երկքաղաքացի անձանց, ներկայության հետ։ Եվրոպական խորհրդարանը զգոնության կոչ է անում՝ կանխելու այս իրավիճակի հնարավոր օգտագործումը ընտրական միջամտության նպատակով։
Բացի այդ, բանաձևում աջակցություն է արտահայտվում Հայաստանի շարունակական ջանքերին՝ ուղղված խաղաղությանը, հաշտեցմանը և Ադրբեջանի հետ հարաբերությունների լիարժեք կարգավորմանը։ Եվրոպական խորհրդարանը ողջունում է խաղաղության գործընթացում գրանցված առաջընթացը և կոչ է անում երկու կողմերին շարժվել դեպի համապարփակ, իրավաբանորեն պարտադիր ուժ ունեցող խաղաղության համաձայնագիր։
Եվրոպական խորհրդարանը վերահաստատում է իր աջակցությունը Լեռնային Ղարաբաղի հայերի իրավունքներին՝ ներառյալ նրանց ինքնության, սեփականության և մշակութային ժառանգության պաշտպանությունը, ինչպես նաև նրանց անվտանգ, անխոչընդոտ և արժանապատիվ վերադարձի իրավունքը՝ համապատասխան միջազգային երաշխիքների ներքո։ Խորհրդարանը կոչ է անում պատասխանատվության ենթարկել հայկական մշակութային և կրոնական ժառանգության ոչնչացման համար պատասխանատուներին և իրականացնել միջազգային գնահատման առաքելություն։
Վերջում, բանաձևում կոչ է արվում ԵՄ-ին ընդլայնել Հայաստանի համար ֆինանսական և տեխնիկական աջակցությունը՝ կենտրոնանալով ինստիտուցիոնալ դիմակայունության ամրապնդման, էներգետիկ անվտանգության, թվային կառավարման և տնտեսական դիվերսիֆիկացիայի վրա։ Նաև ողջունվում են Հայաստանի և Թուրքիայի միջև հարաբերությունների կարգավորմանն ուղղված ջանքերը՝ որպես տարածաշրջանային կայունության կարևոր բաղադրիչ։
