Հեղուկ գազի շուկայում առկա դեֆիցիտի և գների կտրուկ բարձրացման հարցում կառավարության նիստից հետո լրագրողների հետ զրույցում հանձնաժողովի նախագահ Գեղամ Գևորգյանը հստակեցրել է, որ այս իրավիճակը մրցակցության խախտման հետևանք չէ։
«Հայաստանում հեղուկ գազ մատակարարում են 100-ից ավել տնտեսվարող սուբյեկտ։ Որևէ մեկը չի գերազանցում 10%-ի շեմը, այսինքն՝ շուկան խիստ մրցակցային է։ Ընդ որում, օրենքով արգելված է 10%-ից ցածր բաժին ունեցող որևէ տնտեսվարողի նկատմամբ որևէ պրոցես գեներացնել ամբողջ աշխարհում։ Եթե դաշտը խիստ մրցակցային է, ապա մրցակցության հարցերով զբաղվող որևէ կառույց չի կարող միջամտել»,–ասաց նա։
Գևորգյանը նշեց, որ խնդիրը պայմանավորված է եղանակային պայմաններով և մատակարարման խափանումներով։ «Ռուսաստանի Դաշնությունից էր մատակարարվում գազը, որը չէր եկել կամ եկել էր շատ քիչ։ Դրա համար այն մարդիկ, ովքեր ունեին քիչ քանակի գազ, իրենց գինը բարձրացրել էին»,–բացատրեց նա՝ նշելով, որ նման իրավիճակում 10 հազար հոգուց բաղկացած խմբի համար հակամրցակցային համաձայնություն կնքելու հնարավորություն չկա։
Նախագահը հավելեց, որ հիմնական խնդիրը լուծվել է, երբ Լարսը բացվել է։ «Եղանակային պայմաններով պայմանավորված Լարսը փակ էր, հիմա բացվել է, արդեն մատակարարումներ կան, ուստի ենթադրում եմ, որ մի քանի օրից կսկսի գազի գինը իջնել»,–հայտարարեց նա։
Այս հայտարարությունն ի հեճուկս է վերջին օրերին շուկայում տիրող լարվածությանը, երբ հեղուկ գազի գինը հասել էր մինչև 260-300 դրամի։
