Համաշխարհային քաղաքականության համաժողովի շրջանակում Հայաստանի արտաքին գործերի նախարարի տեղակալ Վահան Կոստանյանը մասնակցել է «ԵՄ-ն որպես ռազմավարական գործընկեր. հեռանկարներ Արևելյան Եվրոպայից, Հարավային Կովկասից և Կենտրոնական Ասիայից» խորագրով պանելային քննարկմանը։
Հարցազրուցի ընթացքում պարոն Կոստանյանը նշել է, որ Հայաստանը գտնվում է ոչ սովորական ժամանակների մեջ, որտեղ ավանդական մոտեցումները միշտ չէ, որ գործում են։ Այս համատեքստում նա ընդգծել է, որ Հայաստանին անհրաժեշտ են ոչ ստանդարտ լուծումներ և քայլեր։
Նախարարի տեղակալը նշել է, որ Հայաստանի՝ ԵՄ անդամակցության ձգտումների ճանապարհին ամենաոչսովորական հանգրվաններից մեկն այն օրենքն է, որն ընդունվեց Հայաստանի խորհրդարանի կողմից անցյալ տարի՝ ԵՄ-ին անդամակցության գործընթացի մեկնարկը թույլ տալու համար։ Սա, նրա խոսքով, հստակ քաղաքական դրսևորում է, որը ցույց է տալիս ապագայում Հայաստանի կառավարության և ժողովրդի տեսլականը։
«Մենք իհարկե միամտաբար չենք կարծում, որ 2028թ.-ին կամ 2030թ.-ին Հայաստանը կդառնա ԵՄ-ի անդամ պետություն։ Սա, այդուհանդերձ, քաղաքական հայտարարություն է, որը ցույց է տալիս այն ուղղությունը, որով աշխատում ենք», — նշել է նա՝ հավելելով, որ սա նաև բարեփոխումների նոր և հավակնոտ օրակարգ է, որն իրականացվում է՝ սկսած Եվրոպական միության հետ վիզաների ազատականացման շուրջ երկխոսությունից։
Վահան Կոստանյանը նաև նշել է, որ ԵՄ-ն Հայաստանի համար դարձել է իրական ռազմավարական գործընկեր։ «Ինչպես սիրում են ասել մեր եվրոպացի գործընկերները՝ Հայաստան-ԵՄ հարաբերությունները երբեք այսքան մոտ չեն եղել», — ասել է նա՝ նշելով, որ մայիսի 5-ին Երևանում կհյուրընկալվի Հայաստան-ԵՄ առաջին գագաթնաժողովը։
Նախարարի տեղակալը անդրադարձել է նաև տարածաշրջանային համագործակցության հարցին՝ նշելով, որ Հայաստանը շատ հետաքրքրված է տարածաշրջանում հաղորդակցությունների բացմամբ։ Նա նշել է, որ օգոստոսի 8-ից հետո արդեն ունենք նախադեպ՝ Ղազախստանից՝ Ադրբեջանի և Վրաստանի երկաթուղային համակարգերով հացահատիկ ներմուծելու մասին, ինչը, նրա խոսքով, վառ օրինակ է այն բանի, թե ինչպես կարող է փոխկախվածությունների ստեղծումը նպաստել կայունության և խաղաղության հաստատմանը։
Պարոն Կոստանյանը նաև նշել է, որ Հայաստանն ու Ադրբեջանն աշխատում են երկկողմ ուղիղ առևտուրի զարգացման ուղղությամբ՝ արդեն սկսելով վառելիքի ներմուծմամբ, և հավելել է, որ երկու երկրների առաջնորդներն էլ հաստատել են խաղաղության հաստատված լինելը։
Նախարարի տեղակալը նաև ընդգծել է, որ «Եվրոպական հարևանություն» հասկացությունը, իմաստով, վերաիմաստավորման կարիք ունի։ Նրա համոզմամբ, այսօր «Եվրոպական հարևանությունը» ռազմավարական լինելու համար չի կարող առանց Կենտրոնական Ասիայի, և Հարավային Կովկասը և նրա երեք երկրները շատ կարևոր դեր են կատարում այդ տարածաշրջանը Եվրոպական միության հետ կապելու գործում։
