Երեկվանից Բյուրեղավանի քաղաքային պոլիկլինիկան ողջունում է բազմաթիվ քաղաքացիներ, որոնք դիմում են սրտխառնոցի, փսխման, փորլուծության և ջերմության բարձրացման գանգատներով։ Այս մասին իմ հետ զրույցում հայտնեց պոլիկլինիկայի տնօրեն Արմեն Վարդումյանը։
Պոլիկլինիկան ունի նաև շտապ օգնության ծառայություն, որը գիշերը, ժամը 11-ից սկսած, սպասարկել է միայն երեկ 30 կանչ։ Այսօր էլ առավոտվանից կանչերի հոսքը շարունակվում է։ Շատ հիվանդներ հոսպիտալացվել են «Աբովյան» բժշկական կենտրոնում, սակայն հստակ թիվ չեմ կարող ասել, քանի որ շատերը իրենք են անձամբ դիմել տարբեր հիվանդանոցներ։ Մենք գիշերը ահազանգել ենք Հիվանդությունների վերահսկման և կանխարգելման ազգային կենտրոն, «Վեոլիա ջուր» ընկերություն, համայնքապետարան և Առողջապահության նախարարություն։
Քանի որ խնդիրը համատարած է, մեծ հավանականությամբ խոսքը ջրի որակի մասին է, թեև դա դեռ հաստատված չէ։ Սպասում ենք ջրի նմուշների վերլուծության արդյունքներին։ Կարող եմ միայն ասել, որ խոսքը հարյուրավոր մարդկանց մասին է։
Հարցին՝ արդյոք կան ծանր ընթացքով դեպքեր կամ երեխաների շրջանում թունավորումներ՝ Վարդումյանը պատասխանեց․ «Եթե ստացիոնար ենք տեղափոխում, նշանակում է, որ հիվանդը ունի որոշակի խնդիրներ կամ գտնվում է այնպիսի վիճակում, որ պահանջում է շտապ բժշկական օգնություն։ Երեխաներ, բնականաբար, կան։ Հոսպիտալացվածներից երկուսը Արզնի գյուղից են, ինչը ցույց է տալիս, որ թունավորման դեպքերը չեն սահմանափակվում միայն Բյուրեղավանի քաղաքի տարածքով»։
Առողջապահության նախարարությունից հայտնում են, որ Հիվանդությունների վերահսկման և կանխարգելման ազգային կենտրոնի մասնագետները անհապաղ իրականացրել են համաճարակաբանական հետազոտություն և նմուշառում։ Արդյունքները մի փոքր ուշ կլինեն։ Այս պահին «Աբովյան» բժշկական կենտրոնում հոսպիտալացված է 4 անձ, նրանց վիճակը գնահատվում է բավարար և միջին ծանրության։ Ծանր դեպքեր չկան։
Բյուրեղավանի համայնքապետարանը հորդորում է քաղաքացիներին հնարավորինս խուսափել ջրի գործածումից կամ այն օգտագործել միայն եռացրած վիճակում։
