Այսօր տեղի ունեցավ Հյուսիս-հարավ ճանապարհային միջանցքի հյուսիսային հատվածի, որը կապում է Աշտարակը Գյումրիի հետ, պաշտոնական բացման արարողությունը։ Բացմանը ներկա էր Հայաստանի վարչապետ Նիկոլ Փաշինյանը։
Նորակառուցված ճանապարհահատվածի ընդհանուր երկարությունը կազմում է մոտ 84 կիլոմետր։ Այն կառուցվել է 4 հիմնական փուլով՝ Կառավարության, Ասիական զարգացման բանկի և Եվրոպական ներդրումային բանկի միջոցներով։
Այս նախագծի շնորհիվ Հայաստանում առաջին անգամ կառուցվել է առաջին տեխնիկական կարգի ճանապարհ, որի վրա թույլատրելի առավելագույն արագությունը կազմում է 90 կմ/ժ։ Ճանապարհը ունի երկու երթևեկելի գոտի՝ յուրաքանչյուրը 3.6 մետր լայնությամբ։ Բացի այդ, առկա է 2 մետր լայնությամբ տեխնիկական կամ անվտանգության գոտի, որը նախատեսված է ավտոմեքենաների խափանվելու դեպքում կայանման, ճանապարհի սպասարկման և այլ անվտանգության նպատակների համար։
Ճանապարհահատվածի վրա կառուցվել է 19 տրանսպորտային հանգույց և 10 կամրջային անցում, որոնք ապահովում են անխափան երթևեկություն և մուտքեր դեպի բնակավայրեր։ Կառուցվել են նաև 17 անցումներ գյուղատնտեսական տեխնիկայի համար, ինչպես նաև անասնանցումներ, որոնք տեղակայված են ճանապարհի տակ։ Տրանսպորտային հանգույցներում տեղադրված է լուսավորության համակարգ։
Նորակառույց ճանապարհը զգալիորեն բարելավում է երթևեկության անվտանգությունը և կապում է Հայաստանի հյուսիսային և հարավային մարզերը՝ նպաստելով երկրի տնտեսական զարգացմանը։
