Իմ հարցազրույցի ընթացքում Իրանի Իսլամական Հանրապետության արտակարգ և լիազոր դեսպան Խալիլ Շիրղոլամին հայտարարել է, որ Հայաստանի բարձրաստիճան պաշտոնյաները միշտ վստահեցրել են երկրի լավ մտադրությունների մասին։ Այս հայտարարությունը նա արել է՝ անդրադառնալով տարածաշրջանում ԱՄՆ-ի ներկայության ընդլայնման հարցին։
«Նրանք հուսով են, որ ինչ-որ իրավիճակ չի ստեղծվի, որի հետևանքով անվտանգությունը կարող է խաթարվել․ դա նաև մեր ցանկությունն է, որպեսզի Հարավային Կովկասում խաղաղություն լինի և խաղաղություն հաստատվի»,- ասել է դեսպանը՝ ընդգծելով երկու երկրների համատեղ ջանքերը տարածաշրջանում խաղաղության և անվտանգության ամրապնդման ուղղությամբ։
Խալիլ Շիրղոլամին նաև նշել է, որ Իրանը ամենայն անկեղծությամբ և լրջությամբ մուտք է գործել ԱՄՆ-ի հետ բանակցությունների։ «Չնայած նրան, որ մենք ցանկացած պաշտպանական հնարավորություն ունենք, բայց նախընտրում ենք դիվանագիտությունը։ Մենք գտնում ենք, որ խելամտությունը կարող է հաղթել»,- ընդգծել է նա՝ հղում տալով ԱՄՆ փոխնախագահ Ջեյ Դի Վենսի այցի ժամանակ հնչած «դիվանագիտությունը կարող է արդյունավետ լինել» արտահայտությանը։
Դեսպանը նաև նշել է, որ երկու երկրների ջանքերը պետք է ուղղվեն հյուսիս-հարավ և արևելք-արևմուտք ճանապարհների ապաշրջափակմանը, ինչպես նաև Ջուլֆա-Նախիջևան-Երասխ երկաթգծի շահագործմանը, որը կստեղծի Պարսից ծոց-Սև ծով կապ։
Հարցին՝ թե ինչպես է Իրանը գնահատում տարածաշրջանում ԱՄՆ-ի ներկայության ընդլայնումը, դեսպանը պատասխանել է․ «Լիահույս ենք այս հնարավորությունները, որը Հայաստանը դրականորեն հետամուտ է լինում դրանց կյանքի կոչելուն»։
Այնուհետև նա հայտնել է, որ 2026 թվականին պլանավորված է Հայաստանի վարչապետի այցը Իրան, որի ընթացքում սպասվում է երկու երկրների միջև համապարփակ ստրատեգիական փաստաթղթի ստորագրում։
Դեսպանը հաստատել է, որ Հայաստանի ղեկավարությունը հստակ հայտարարել է, թե չի թույլ տա Իրանի դեմ որևէ քայլեր ձեռնարկվեն։
