Այսօր, Ազգային անվտանգության ծառայության (ԱԱԾ) աշխատողի օրվան նվիրված միջոցառման ընթացքում ՀՀ վարչապետ Նիկոլ Փաշինյանը հայտարարեց, որ պետությունը զարգացնում է ԱԱԾ-ի ուժային կարողությունները։
Նա ընդգծեց, որ սպառազինությունների ձեռքբերումը կատարվում է ոչ թե դրանց կիրառման, այլ դրանցից խուսափելու նպատակով։ «Մեր ձեռք բերած սպառազինությունները, ռազմական տեխնիկան և այլն ձեռք ենք բերում չկիրառելու հույսով և նպատակով»,- նշեց վարչապետը՝ ընդգծելով, որ ԱԱԾ-ն պետք է ունենա շատ հզոր ուժային բաղադրիչներ։ Նրա կարծիքով՝ ուժի կիրառման անհրաժեշտությունից խուսափելը պետք է լինի ծառայության հիմնական առաջնահերթությունը։
Փաշինյանը նաև անդրադարձավ Հայաստանում թմրանյութերի ապօրինի շրջանառության խնդրին՝ նշելով, որ չի կարելի մխիթարվել այն հանգամանքով, որ այս երևույթը գոյություն ունի ամբողջ աշխարհում։ Նրա կարծիքով՝ այս խնդիրը պետք է դիտարկվի որպես ազգային անվտանգության լրջագույն սպառնալիք։
Վարչապետը նշեց, որ պետական մարմինները պետք է կենտրոնանան ոչ թե թմրանյութերի փոքր քանակներ գտնելու վրա, այլ ներմուծման և արտադրական շղթաների բացահայտման վրա՝ ակնհայտ դարձնելով, որ այս ապօրինի շրջանառության մեջ կան կենտրոնացված կետեր։
