Ազգային ժողովի նախագահ Ալեն Սիմոնյանը ֆեյսբուքյան իր էջում հայտարարել է, որ ապրիլի 24-ին ընդառաջ որևէ երկրի, հատկապես հարևան երկրի դրոշ այրելը ստվեր է գցում Հայոց ցեղասպանության զոհերի հիշատակի օրվա վրա։
Նրա խոսքով՝ նման գործողությունը անիմաստ, ամոթալի և խիստ դատապարտելի է։ «Այն հիշատակի, միասնության և ապրելու մասին է, իսկ նման քայլերը համարում եմ ճղճիմ և անընդունելի սադրանքներ՝ խաղաղության և ապագայի դեմ»,- նշել է Ալեն Սիմոնյանը։
Ավելի վաղ վարչապետի մամուլի քարտուղար Նազելի Բաղդասարյանը հայտնել էր, որ վարչապետ Նիկոլ Փաշինյանը ապրիլի 23-ին Երևանում ՀՅԴ-ի կազմակերպած ջահերով երթի մասնակիցների կողմից Թուրքիայի դրոշի այրումը համարում է ակնհայտորեն սադրիչ և լարվածություն հրահրող վարքագիծ։
